Prins - VV De Kwakkert Heythuysen

Naodèt de de nuje Jeugdprins en de nuje Jeugdraod waas gepresenteerdj aan de Heitser minse, waas ’t natuurlik tied väör de groeëte Prins.

Väöraafgaondj aan de daadwerkelikke presentatie van de Prins waerdje, zoeë-as inmiddels ’n good gebroek is in Heitse, ’n sjoeën filmpke aafgespeeldj, woeë, wie toepasselik, ingespeeldj waerdje op de actualiteite van de verkeezinge.

Dudelik waerdje waem de verkeezingen in Heitse haet gewonne, namelik Paul I, de nuje heerser van ’t Kwakkerterieëk.

Paul Suntjens, 34 jaor jónk, woeëntj same mèt zien vriendin Danique en häöre hondj Ziggy. Paul haet zien spore al ruumsjoots verdeentje in de Heitser vastelaovendj. Inkele jaore gelaeje haet d’r duchtig kinne oefene as dé Prins van de B&A-Boys en aafgeloupe jaor mook Paul deil oet van de Borefemilie.

Door de waek, as d’r neet hooftj te traine bie ’t veterane-voetbalteam (34 jaor???), wèrktj Paul als Business Controller. ‘Ns kieke of d’r ouch de kómendje maondje de controle kan haoje äöver zeen gezelsjap. Want dao zitj eine brok ervaring... Twieë men die al jaore bie de Raod van Elluf zeen en eine dae ’t van thoes oet neet angers gewintj is.

Sven Henderickx, Jeroen Beerens en Bas Reuvers, staon Paul en Danique, same mèt häör dames bie, óm ’t vastelaovesjaor 2026 toet ’n good inj te bringe en d’r ein onvergaetelik jaor van te make.