Koelekop
Sem I, Jeugdprins 2025-2026
“Sjoeël, voetbal en sjötterie de balle, wae gaon dúchtig knalle!”
Op zaoterdigaovendj 15 november, tiedes ós Prinsebal, waas uiteraard ieërst de jeugd aan de bäört. Ónger leiding van de jeugd-commissie en Jeugdvorst Sepp waerdje Sem Reijnders oetgeroope as de 59e Jeugdprins van De Koelekop.
Aafgeloupe seizoen haet Sem al flink gaas gegaeve biej de Jeugdraod. Noe moog d’r dit jaor zélf as Jeugdprins de scepter zweije. Hae haet 't vastelaovesblood neet van vraemdje en is ein echte vereinigingsjóng. Hae is actief bie de voetbalclub en löptj gruuets in de maot biej de sjötterie as Jeugd Tambour-Maître.
Sem is de aodste oet ‘t gezin Reijnders. Ouch zien aojers Rene en Chantal en zien breurke Dean zeen echte vastelaovendj-veerders. Dus det waertj zeker ein fieëst!
Jeugdvorst Sepp Geenen, zoon van Rob Geenen en Kelly Linders, is zien allerbèste vrundj en zal ouch dit seizoen weer de Koelekop äöveral woeë ze kóme netjes aankondige en duchtig gaon fieëste in edere zaal of tent.
Gruuets haet Sem ouch nog twieë Heitser maedjes as adjudanten gepresenteerdj. Zien adjudante zeen Luna Hendriks, dochter van Ron en Jolanda. En Floor Geraets, dochter van John en Vroni.
Jeugdprins Sem I ziene spreuk is: “Sjoeël, voetbal en sjötterie de balle, wae gaon dúchtig knalle!”
Natuurlijk is er naeve dit prinselik gezelsjap ouch nog ‘nne gloednuuje Jeugdraod van 11 (of eigenlik 12...) gepresenteerdj mèt de volgende leeje: Roos van Beek, Luca Frenken, Saar Geraets, Loek Sturme, Danee Peters, Lola Bonten, Esmee Verbruggen, Lenn Jacobs, Emma Caris, Stijn van der Kop, Zarah Teeuwen en Raf Ceelen.
De receptie van Jeugdprins Sem I en Prins Paul I waertj gehaoje op zaoterdig 7 fibberwarie 2026 in De Bombardon.
